Psa 40 | MMX | STEP | Nia aga ngangais atnaasan ti loklok tooro at Leeme Silok tia; la ni ga ronga bok lanteng tarak la ga ronga res tarak.

Psalms 40

Loxompixan Emi Asu

1 Nia aga ngangais atnaasan ti loklok tooro at Leeme Silok tia; la ni ga ronga bok lanteng tarak la ga ronga res tarak. 2 Ni ga sar asu ka ia at lemeron kapmek, la ga sar asu xaka box ia at lububura. Ni ga vaxaru li avukar ia ro vana at luuat kis silok kusu anat pas avukat la anoxo marat at tempanga. 3 Ga lox ase ia rik pixan loxompixan maxat, loxompixan emi asu ri ne Moroa atnedik. Buaang nedi limixin dinaba ven kibis lolos teren, dina sangu aleng la dina ii doxoma la dinaba nuunu saga at Leeme Silok.

4 Lomomo rinedi di nuunu saga at Leeme Silok, la rinedi bok kopmen dina repukus mu laxampoovo moroa, kopla dina nemen eburu minedi di lotu saparap laxanmoroa xaxarang. 5 O Leeme Silok, nenu ne Moroa atnema. Buaang laxampanga avukat ugara lok pam i rinema; kopmen tara i nunuan polo u! Ugara lox asuusu vam buaang lempanga sangsangu nunuan tinema. Ixo epovo xusu nia ana tong ampana leexes atdi atla mo levempanga i umsu aleng!

6 Nenu uxo vavara solo ri levelaplavang mi leventamtaba, nenu uxo ngising ti levempanga mi lavanuet kangkedek kusu mana kotos asonao i ro vana at loxonin laplavang, kopla ri levelaplavang ti lok kepe laxakapmek. Ketla uga raba ia mi lubaalung ting tonga res taram. 7 Kuren la nia aga lok tu xeretna, “Nenia nga na, levenanasa ram tia i nemen keneng at Lenavolo.” 8 Moroa rak, a vavara mene i xusu ana gugu mu asu mun lavavara ram! Levempanga axap uga lox ase ia min, i nemen keneng at labalak.

9 O Leeme Silok, to melamgo at lovotpot buru at limixin axap taram, nia aga vaase asu lagale lavavang dola uk lox arooro nema limixin taram. Nu uklen i do nia anoxo vamngus ti tong asu i. 10 Agoxo vam luxun kaka lagale lavavang ti loklok arooro ria xusuk; nia ara tong asu amisik pam i do uk lok tooro limixin la uk lox asoorun levelinga ram tidi. Kopmen agoxo vamngus ti tong asu lixitkis esogo mi labalamu lexen taram to melamgo at lovotpot buru at limixin taram 11 Leeme Silok, nia aklen i do lebelemumu ram tia noxo xap. Labalamu mi loklok tatao tuturun taram naba kok avukat amisix ia.

Lisingising Ti Loklok Tooro

12 Laxanmumuat solo i tu xangkan ia la nia xo epovo xusu ana exes ampana di! Laxaloklok kakapmek tarak i sak pava rino ia, la axo epovo nga ri milik kadas; di volo aleng ti leexes at levengkabinim at lavatlak tarak, la labalak i doma abulubun. 13 Leeme Silok, una lox asepsu ia! Lok tooro nga ia na! 14 Nedi nom di lok do dina sev amer ia, nia a vara i do una sak tup midi, la una lox ekarakat tinotno di. Nedi nom di momo atla laxanmumuat i sak pava ia; a vara i do una xala xepe di la una lox amangan di. 15 Nedi nom di lok kalise ia, una lox amangan tino di mumu loklok di lox i ria.

16 Nia a vara i do nedi di repukus taba u, dina momo la dina sosoro. La nedi nom di tong loklok avukat ti loklok arooro amisik, dina tong i do, “Leeme Silok i silok aleng.”

17 O Leeme Silok, labantuxu rak ira xat molos axap la arat kis banbalo nga, ketla kopmen una doxomampe ia. Nenu Lanatoo rak, la nenu ne Moroa rak, una lok tooro soso mun ia!